بعد قراءة المقال جاوب على السؤال السابق!!
لما بتمتلك حاجة بيكون لك مطلق الحرية في التصرف فيها دون أن ينازعك احد.
عقلك ربنا وهبه لك ملكية خالصة.. وله استخدامات كثيرة إرادية ولا إرادية.. طبعا كلنا عارفين الاستخدمات اللإرادية للمخ التنفس وهضم الأكل وكل العمليات البيولوجية اللي بيقوم بيها الجسم.
الاستخدامات الإرادية مثلا انك تختار لون بنطلون بتشتريه.. أو انك تقول رأيك في أكل معين اتقدم لك.. أو تفهم درس.. أو تدخل فى نقاش وتبدأ اقناع الطرف الاخر بوجهة نظرك.. كل الأفعال دي إرادية.. لما بتعملها انت كده استخدمت حقك الطبيعي في استغلال ما هو مملوك لك (مخك).
في فئة من الناس قررت انها تتعامل مع مخها على انه ايجار.. يعنى لازم تسأل صاحب الملك على كل تفصيلة أو تستنى التعليمات وتفسير الأحداث وهكذا.. الفئة دى بتتعامل مع المخ على انه مش موجود بتسمع كلام من قناة تليفزيونية مثلا تلاقى الشخص بيتصرف تلقائيا بإعادة الكلام كما هو بالحرف.. يعنى كمان مش بيعمل مجهود انه يضيف بصمته الشخصية على الكلام اللي سمعه.
هتلاقي الفئة دي بتستخدم كلمه بيقولك كتير فى كلامها.. لانه فاتح ودنه بس لتلقى الكلام وبعد كده الكلام بيدخل مرحلة تانية.. الترديد.. تلاقي الشخص ده بيعيد الكلام نصا كما قيل حتى لو عاد الكلام ألف مرة.. مش بيقدر يزود عليه أو ينقص منه.. لانه مش عارف أصلا اللي قال الكلام ده قاله ليه.
انت كده أجرت مخك لأي حد بيقول كلام شكله حلو ومترتب.. كلام زي الحقيقي.. لما تدخل في مناقشة وتفنيد للكلام مش هتعرف ترد لانك أصلا مش عارف الكلام ده اترتب كده ازاي..
مفكرتش تعمل بحث بسيط تعرف هل الكلام ده صح أو لا.. رغم ان وسائل البحث اصبحت كتير وفي متناول الجميع في كل مكان وزمان.
متزعلش بقى لما يقولوا عليك من القطيع.. ماهي دي صفاته.. مأجر مخه ببلاش لكل من هب ودب.
سايب نفسه لأي حد يستعمله في نقل افكاره وفجاة تلاقي مخك مجرد كيس بلاستيك بينقلوا فيه الكلام وانت بتردده.
مع انك لو فكرت تستعمل مخك اللي هو فى الأصل ملكك وتفسر وتحلل الخبر أو الكلام اللي سمعته وشوية مجهود بسيط عليهم هتقدر تفهم الكلام ده معناه ايه أو القرار ده أخدوه ليه، من غير ما حد يستغل انك كسلان تدور وتشغل مخك الحاجة اللي ربنا ميزك بيها عن باقى خلقه.
السوشيال ميديا والبلوجرز بقوا متحكمين في عقول الشباب.. اشتري من هنا كل من هناك البس البراند ده قاطع البراند التاني.. كأنه مفيش مخ نسأل اشتري ليه حاجة مش فى احتياجاتى ولا اقاطع حاجة انا مش عارف المقاطعة دى هتأذي مين أصلا.
ممكن نهدى على نفسنا شوية ونفكر ونشغل الجهاز العبقري اللى ملكنا.. المخ.
زي ما بتضيع وقتك وتتفرج على فيديو أو برنامج توك شو يوجهك للي هو عايزه وفر الوقت ده ودور بنفسك ومتخليش حد يأجر مخك ويحولك لببغاء بتردد اللي هو عايزه بدون فهم.
تحياتي لكل شخص بيستعمل مخه اللي بيمتلكه ..
