حلت ضيفة على برنامج مساء الإمارات، الذي يذاع على قناة الظفرة، وتحدثت عن دورها في جعفر العمدة وكواليس بدايتها الفنية وكذلك مسلسل اللعبة.
وقالت مي عن دورها في جعفر العمدة : الدور جالي من محمد سامي، وهو قالي وأنا بكتب الشخصية دي، مش شايف حد يعملها في مصر غيرك، وفرحت جداً لأن هو بالنسبة لي مخرج مهم، وكان فارق معايا في تاريخي إن يبقى اسمي اشتغلت معاه، خاصة إننا أصحاب من زمان.
وتابعت عن بدايتها في التمثيل: أنا اتحولت من مطربة مثلت لـ ممثلة هتغني فجأة، ولما بدأت في الغناء مكنش في بالي التمثيل، أما عن كليبها شيل ده من ده تابعت: ياسر سامي قالي الألبوم كله مفهوش أغنية تأكلك عيش، أنا عايز أغنية شبهك، وإنتي مش البنت الكيوت الهادية.
وأضافت: بدايتي في التمثيل كانت في مسلسل لا أحد ينام في الأسكندرية وأنا بصور المسلسل، أحمد الفيشاوي كلمني علشان تامر وشوقية، وبعدها المسلسل نجح ونسيت إني مطربة.
كما تحدثت عن أحمد عز قائلة: اتبسطت بالتجربة مع أحمد عز في 365 يوم سعادة وحلم عزيز وأستفدت منه كتير وعلمني حاجات كتير، وهو متواضع جداً مع الناس.
واستكملت حديثها عن مسلسل اللعبة قائلة: كنت من محبي شيكو وهشام ماجد من البداية، وبحب مدرسة الضحك بتاعتهم، ومسلسل اللعبة كان وش السعد عليا والرجوع القوي وسعيدة بوجودي في المسلسل.
