لا طبعا.. الزلازل بتحصل لما تتحرك الصفائح التكتونية.. طب ما يمكن بتحصل برضه بسبب الذنوب؟ لا برضه.. بدليل ان الزلازل بتحصل في قلب البحار و المحيطات.. فهل السمك مثلا هو اللي عمل الذنوب؟!
الزلازل بتحصل من قبل ظهور الإنسان علي الارض من مئات الملايين من السنين. وكانت أشد من دلوقت بكتير، فهل دي كانت ذنوب الديناصورات مثلا ؟!!.
امال ليه عمر بن الخطاب بيقول كده؟ده كان معتقد سائد في القرون القديمه قبل اكتشاف الأسباب الحقيقيه العلمية، لكنه لا يستند للدين بقدر استناده للخوف البشري و الثقافة الشائعة، ولو كان عمر بن الخطاب حيا في عصرنا ما قال هذا الكلام.
الرسول عليه الصلاة والسلام برضه مقالش ان الزلازل بتحصل لسبب ديني.. ولا القرآن قال كده.. وياما عصاة عاشوا بدون أي زلازل.. و ياما مؤمنين ماتوا في أنقاض الزلازل.
امال ليه رمضان بطيخة بيروج لهذه الافكار؟لسببين.. أولا انه ضد العلم علي طول الخط و عاوز مجتمع الدروشة، لان ساعتها قيمته كدجال هتزيد!.
ثانيا هو من أكبر المساهمين في نشر الالحاد بهذا الكلام بين الشباب المتعلم، و انتشار الالحاد يبرر له و للمراكز التي يعمل لصالحها مزيد من الدعاية و التمويل و الانفاق.. امال انت فاكر الفيديوهات الاحترافية و الكتب المطبوعة طباعة فاخرة و المترجمة للغات كثيرة.. كل ده منين؟.
في الوقت اللي تلاقي دور النشر بتعاني لنشر كتاب عادي.. دول تلاقيهم بيطبعوا طبعات فاخرة و مترجمين للغات و لا أجدعها حاصل علي نوبل!!
زي ما كان الإخوان يهمهم استمرار الفساد و الفقر و الجهل عشان يبقي فيه مبرر لنشاطهم قدام الناس، برضه تنظيم نصابين ضد الالحاد يهمه استمرار الالحاد و الا هيصيعوا ومش يلاقوا ياكلوا !!
مش بالضروره الدجال نفسه يبقي فاهم كل ده.. إنما اللي مدور الليلة فاهمها و مختار اللي يناسب الهدف ده.
