الكلام دا انتشر من فترة زي النار ف الهشيم والناس صدقته.
خلوني أوضح لكم ليه الكلام دا خبل.
صاحب النظرية دي ما هو إلا واحد بدقن حاول تديين التاريخ وتطويعه مع القرءان.
لكن الحقيقة ايه؟
الحقيقة ان البوست الطويل المرتب اللي الجدع دا اثبت فيه (من وجهة نظره) ان مفيش حاجة اسمها فراعنة وان فرعون دا اسم شخص، مجرد سرد جدعنة منه كدا.
انتو محتاجين تقروا كتير علشان تعرفوا.
مفيش دراسة علمية بتقول الكلام دا خالص.
ولا دورية علمية قالت كدا.
وحتى مفيش مؤتمر علمي محترم واحد ناقش دا.
مفيش بحث معتمد قال كدا.
الحاجة الوحيدة اللي قالت الكلام دا، البوست الطويل اياه اللي فضيلة الشيخ صاحبه اعتبره دراسة علمية وعجبكم ترتيب الكلام وتنسيقه.
اما علميًا وتاريخيًا واثريًا خد المفاجأة دي..
لا وجود لسيدنا موسى اصلا ولا للانبياء في التاريخ الفرعوني كله.
وايضا لا وجود للصراع الديني والسلطوي اللي حصل بين سيدنا موسى والفرعون المزعوم.
ولا وجود لأنا ربكم الاعلى اللي مزعلاكم من فرعون اللي الراجل أبو دقن بنى حكايته ورأيه عليها.
هنا.. هتبتدي تضايق وتشتم في سرك..
ما تشتمنيش انا..
انا بحط امامك على الترابيزة المعطيات وانت تفكر.. انا مش طرف. انا بكلمك معلومات مش تحليل.
هتسألني وانت محموق وتقولي يعني القرءان غلط؟
هقولك مين اللي قال كدا؟!
انا بقولك الراجل أبو دقن ركبلك حاجات غلط على بعضها واقنعك بيها، وكل اللي انا بعمله دلوقتي اني بقولك انه مركبها غلط.
انت بقى لما تفكها هتعرف الصح فين!
كل اللي عايزك تعرفه ان لغاية دلوقتي محدش يعرف مين هو فرعون موسى اصلا.. يعني الراجل ابو دقن باني قصة غلط ف غلط.
نكمل..
دا بخلاف انه مثلا استند على حاجات تبدو للعوام حقيقة ودليل ولكن للباحثين كوميدية.
زي تأكيده ان فرعون (اللي بيقول عليه) مات غرقان ودليله هو وجود ملح البحر في جثته!..
هو انت متعرفش ان الملح مكون اساسي في التحنيط!.
اخطر حاجة بتهدد الدين هي الناس اللي شبه الراجل دا.. الناس اللي مصممة تربط القرءان بالتاريخ والعلم.
القرءان ليس كتاب تاريخ ولا علم.
اللي قالكم انه تاريخ وعلم هو سبب كل المصايب اللي احنا فيها، وهيفضل يعاني ويعاني لغاية ما هيخربها خالص لانه مش محترم مستر جوجل اللي فتح الدنيا والبحث امام الناس كلها.
نيجي بقى لمتخصصي الشغلانة زي زاهي حواس.
لما اتعرض عليه الكلام دا، حواس ضحك وقال: “ايه الخبل دا”.
“الفرنسيين (اشطر ناس في علم المصريات) ما يعرفوش حاجة عن كلام الراجل دا ولا يسوى عندهم تعريفة”.
طيب ايه اللي الراجل دا عمله؟
زي ما قولتلكم.. عمل تديين للتاريخ وهو مالا يصح علمًا وتطبيقًا.
اصدقائي الاعزاء..
إسمهم الفراعنة ودا الاسم والصفة المعتمدين داخليًا وخارجيًا في العالم كله، والراجل اللي اقنعكم بغير كدا ببوست، دا راجل مدلس وعايز يستغلكم في نشر الكلام ده وبس.
