التخطي إلى المحتوى

فرتكت علبه سجاير من يومين
بقيت بسمع موسيقى كتير
وبدي السيجاره حقها في النكوتين
واملى نص الكاس
في صحه هذا اليأس والانجاز
انا لاول مره اتوه عن البني أدمين
خلافا عن اتصال وريد القلب بالاشياء
بقيت بمتلك بروحي
اغاني واشعار
وبنت تجيب الليل عـ النهار
ومصاحب شيطان فـ الليل
لم العزال لما لقى العزله هى الحل
اشمعنا الاشجار اتصحابت عـ الخريف
فـ سابت ورقها لارتبطها بورد نضيف
كفايه عليها المطر والدخان
او لـ شاب وقف تحت ضلها متخان
وقعدت هي تبكي بالساعات
بعد قطع فروعها قبل الانتحار
خد خطوتين يمين ودخل اول بار
وحط فـ جيب قميصه
قريب كده من القلب
تنهيدات وسكات .. وتفكير فـ الموت اوقات
مفيش جدار عازل لحزنه الا هذا القماش
او لشخص قال استنى هنا ومجاش
كأنه مختار سهم الموت هدف
رغم الزحام…
بتحب ايه فى زمان ؟
دفا الشتا
ولا لـ شَعرها اللي خد في البلطو الاسود مكان
الولد شاف الحل
فى صور الالبومات
والقسوة رصيد بتجمع بعد حساب
مش مهم مين اللي مات
ما المحدوفين في الدنيا اكتر بكتير
وادى عندك الدليل
شوف ياسيدى كام واحد انهردا ساب
غفل البيت وصحي مسك اول كتاب
بص على الخلفيه
قرا الاسم صاحب الاشعار
خد جرعه زيادة من الوحده فـ مات
والواقع مهما كان
مش زى الافلام
البطل يجي من ورا الجمهور
حتى لو مات فـ النص
هو مازال حي
كل اللي جي …. يسقف
خاف من طببيعه العرض
ازاى مات فـ حضن حبيبته من البرد
كلامكم مش مفهوم انتوا كدابيين
مش دى النهايه المنتظره
البطل والبطله..عايشين
الشك بيكبر بس اللقطه مقنعه
انتو اللى مُصرين تخلونا مكتأبين
طيب بدلو الادوار
خلو الخاين يتخان
وخلو اللي حب مستقبل وطريق
طول الشوارع لو ممل عادى
ممكن يخلص بأغاني فيروز
لكن طول الايام مش بالساعات
دا على حسب نوع البعد والفراق
كل الفرص قدامك قبل الخَيار
ياتكون والدها او ابنها البار
او تخون عادى
وتقول هى الدنيا فيها ايه علشان يتعاش
بس هى قالت بحبك وانت مقلتهاش
الكلمه سهله وياما اتقالت فى اغنيات
بس دي طلعت من حد عظيم
والامر دا صعب
هو انت في حد بيحبك
دا حتى يومك روتين
تأكد ان رحلتها اجمل
ومعاها ضمان
فـ بلاش تتعبها ارجوك
وماتخدش ذنبها باللى خانوك
انا قولت ..
بقى معقول فى قصه تكتمل
متبررش رحيلك بالخرافات
نسيان البنت ببنت
للأ سف اتجاهك لسير الناس كان واضح
بل في تمام الوضوح
سارق التجربه مفضوح
مفيش حل غير قبول رحيلها بغيابك
ودا الدَين الوحيد اللي لايمكن يترد
ولاتبعتلها رساله مفيش حد موجوع بيرد
ورق البيانو مل من العزف
بس هو ملزوم
كل التذاكر المدفوعه لرصد حزن البنأدمين
خلصت نوته من المضمون
يا أيها التعود
انا جدير لك بالشفاق
كل المشؤمين في واحد منهم فاق
خلوا هذا اليوم للتذكير
وان علاقه الوحده بالبيانو نجاه
وان حفظ اربعين رساله من البحر
مش كافيه لشد صياد تاه
خلاص أمنت
بس انا لسا عندى نقص
نسبه اضاءه اوضتى قل
انا كان ليا صاحب هنا مل
بيقسم معايا هدوم واوجاع
بس تعب من الشكوى المفرطه
حتى ماقلش انه هيغيب
عدى عليا تانى عيد… وماشفتوش
آله الوهم خلاص بقيت صديق
والوحده الوان
مش شرط تترسم على لوحه بيضه
مفيش وحده بتيجي غير بسواد
او شعور حلو كان هنا واتباد
الفرحه شدت من صور الذكريات
والذكريات خوف من اللى جي
فـ بلاش دور فشكلم بحبكم فينا
فيزيد تصديقي بوجودى حي
يارب انا كنت يوسف وصَديق
وصوفي متدين لكن قررت اتوب
والرمش اللي فـ عيني دا نهايه
والبياض اللي في قلبي دا ضمير
وحبك ليا في الدنيا
اكبر دليل لحد كره النفس
حبها من غير تفسير

عن الكاتب

التعليقات